Ua tomua le amataga o le masina o Iulai i se tala fiafia mo le ‘aufaisaofaga i le faalapotopotoga o le faaputugatupe o le lumana’i manuia o tagata le NPF, i le 6 pasene o le tufatufaga masani le dividend, lea o le a tuusa’o ai i le tagata fai saofaga le 3 pasene e fua i le aofa’iga o lana saofaga o loo teu faafaigaluega, ae ave le isi 3 pasene i le saofaga e teu ai, ae avanoa ai foi ona talosaga i se nonōgatupe pe a finagalo iai.
E silia i le 61 miliona tālā le aofa’iga o le tupe mai le 6 pasene o le a faaalu i le tufatufaga poo le dividend lona lua o lenei tausaga.
O Fepuari o le tausaga nei na maua ai le isi tufatufaga e 4 pasene ma ua maua ai le 10 pasene ua tufa e le NPF mo ana ‘aufaisaofaga i lenei tausaga.
O le afioga i le Sui Palemia ma le Minisita o Tupe o loo iai le vaaia o le faalapotopotoga o le faaputugatupe o le lumana’i manuia o tagata, faatasi ai ma le ta’ita’ifono o le Komiti Faatonu ma le Ofisa Sili o le pulega o lea faalapotopotoga a le malo, sa faalauiloaina le 6 pasene ua pasia mo le tufatufaga ua amata ai le tausaga faaletupe fou 2026 i le 2027.
Le afioga i le tama’ita’i Sui Palemia o le Minisita o Tupe le afioga Mulipola Anarosa Ale Molioo.
Ua faailoa e le pulega a le NPF e 35 afe tagata faisaofaga o loo iai a latou seleni i le faalapotopotoga.
