Ua lipotia mai nei le pa’ū ai o le penisini i lalo ifo o le 3 tālā i le lita mo le ulua’i taimi talu mai le masina o Mati.
Ae ua faamanino e le alii Palemia, Christopher Luxon, e ui i lena tala fiafia, ae e lē o se taimi foi lea e amata taofi ai ona faamatuu mai fesoasoani a le malo, ona o lona iloa e le’i oo lava i se tulaga e ono aveese ai ia fesoasoani.
Mo le silafia, o lenei fesoasoani, na amata mai le masina o Aperila, o se fesoasoani tupe e tuuina atu i tagata e tau tali atu ai i le taugatā o le suāuu ma le penisini.
E pei ona iai le tusa ma le 143,000 o tagata faigaluega e maua le $50 i le vaiaso, ma le isi to’a 14,000 e maua fesoasoani laiti.
Na faamanino mai foi e le alii Palemia, o le a taofia fesoasoani nei pe a faatumauina pea le pa’ū o le penisini o le 91 i lalo ifo o le $3.00 i le lita mo vaiaso e fā.
Ma o ia suiga na māua mai i iloiloiga ma galuega māta’itū a le auaunaga o le Gaspy i le aso ananafi i tulaga o iai tau o suāuu ma penisini i le atunuu.
Ae ua faailoa e le Palemia e vave lava ona suia tau o le suāuu i tulaga faavaomalo, ma o se tulaga e femoumoua’i ai lava le ono faatumauina o se tau i suāuu ma penisini i le tulaga faalotoifale.
Ua faapea mai fo’i le ta’ita’i o le Itu Agai, Chris Hipkins, e lē tatau ona faalagolago fesoasoani mo tagata faigaluega i suiga o le tau o le suāuu, ona o loo latou mana’omia pea le malaga i galuega i aso uma.
Puna o Faamatalaga: https://www.rnz.co.nz/news/politics/642030/incredibly-volatile-long-road-to-travel-before-fuel-relief-payments-stop-says-pm
