O loo teena e mātua o le teine talavou e 21 tausaga le matua, na maliu ina ua pule i lona ola a o iai i le falema’i mo i latou e iai aafiaga o le mafaufau, le talosaga ina ia taofia le faailoa faalaua’itele o le igoa o le tagata faigaluega o lea falema’i o loo tuua’ia i le maliu o le la tama.
I se lipoti mai le pule o maliu poo le coroner, Matthew Bates, o loo ta’ua ai, o le maliu o Erica Hume ia Me i le 2014 i le falema’i i Parmerston North, sa tatau ma e mafai ona taofia mai le tupu, pe ana sa’o ona mulimulita’ia ta’iala ma taualumaga o le tausiga o le la tama a o feagai ma lea gasegase.
Na faitioina foi e le pule o maliu le auala na faatulaga ai le ward sa iai Erica ma māua foi i le lipoti, le feagai o le aufaigaluega ma le tele o faafitauli ona o le to’atele naunau o gasegase sa latou tausia.
A o lei sau i tua lea lipoti a le pule o maliu i le Aso Gafua talu ai ma le taimi na amata ai lea su’esu’ega i le maliu o Erica i le 2022, sa iai le poloa’iga ina ia taofia le faailoa o suafa ina ia puipuia ai le aufaigaluega a le vaega o le soifua mālōlōina na aafia i le maliu o Erica.
Ina ua sau i tua le lipoti o le su’esu’ega, na faailoa e le faamasinoga, e na o le to’atasi se tagata faigaluega o loo talosaga pea ina ia tumau ona lē faailoaina lona suafa, o le tausi soifua lea na gafa ma le taimi na taofia atu ai Erica i le falema’i.
O lea faai’uga na tetee iai mātua o lea tama’ita’i i lo la manatu, e lē tatau ona natia i tua igoa o nei tagata faigaluega i tulaga na māfua ona tutupu ona o le lē lelei ona faatino o la latou galuega.
E manatu mātua, e lē fetaui le faaaliali mai i fafo i le lautele o faamatalaga uma i le soifuaga ma le faafitauli na aafia ai si a la tama a o faagasolo su’esu’ega, ae o lea e malupuipuia faamatalaga o i latou na tuua’ia i le lē lelei ona vaai o le gasegase.
O nisi o faaletonu i le faatinoga o galuega na māua i lea lipoti a le coroner e faapea, e le’i faia se iloiloga o ni tulaga lamatia poo se risk assessment i le taimi na taofia atu ai Erica i le ward, ma e iai foi nisi o pepa o galuega sa tatau ona faatumu i le taimi talafeagai ae le’i faia, o faamatalaga na e matuā tāua lava ina ia iloa sa iai le lamatiaga o le ono pule o Erica i lona ola, ma o le leai o na faamatalaga sa le’i iloa ai e i latou na faigaluega se mana’oga ina ia matuā vaavaaia ma le toto’a lenei gasegase.
Ta’ua i le lipoti, e le’i faia se siaki o Erica e tusa ai ma ta’iala a le falema’i, ma i le aso 7 o Me 2014, na iai foi le taimi e toetoe atoa le itula o tuu na o Erica i le potu e aunoa ma se tasi na iai e vaaia.
E iai le faamoemoe o le ulugalii, e talosia ia iai ni moliaga e faia i lenei matāupu e tusa ai o le i’uga o le su’esu’ega na faia.
Puna o Faamatalaga: https://www.rnz.co.nz/news/health/598140/parents-of-student-who-died-at-mental-health-ward-oppose-name-suppression
