O le mālōlō ai o galuega a le fono aoao faitulafono i le aoauli o le Aso Lulu na faatino ai le finagalo o le malo i se tasi o ana faiga faavae, o le su’eina lea o sui faipule uma o le Palemene pe o latou tagofia fuālaau faasāina.
O se fuafuaga sa faailo e le Palemia i le amataga o galuega a le fono aoao o lenei tausaga, ae o lea ua faatino.
Peita’i e le’i nofoa’i ai le sui faipule o Lotofaga sa avea ma Palemia i le paea’iga 17 a le Palemene ona sa fia manino le afioga Fiame Naomi Matā’afa i le auala ua faatino ai e le faigāmalo lea su’esu’ega i lana fesili fia malamalama pe tatau ona avatu se tulafono e faasinoala ai i le lumana’i lea faiga fou, ae pe o le ā le faai’uga e faia i se faipule pe a faamaonia lana su’ega poo le test.
O se vaega o felafolafoa’iga i le va o le sui faipule o Lotofaga, o le Fofoga Fetalai ma le ta’ita’i o le malo i le Palemia.
