Ua toe tusi aao le pulega o tagata tafafao a Samoa i le auaunaga a le Onomea Productions e faaauau ai ona latou tapena tauvaga e sa’ili ai se Tausala o Samoa mo le isi 3 tausaga.
O lea filifiliga sa taunuu iai i le mae’a ona folasia e lea auaunaga tuma’oti nisi o ana tapenaga taula’i mo le siitia o lea tauvaga i tausaga o i luma, aemaise o lana ta’iala o le a lima ta’ita’iina ai ana tapenaga uma i le lumana’i.
Faaalia e le Ofisa Sili o le pulega o tagata tafafao mai fafo le susuga Niumata Kitiona Pogi e iai lona lagona o le toe filifilia o le Onomea Productions e faia galuega uma mo tauvaga e sa’ilia ai Tausala o Samoa, o le a avea ma se isi laasaga e siitia ai le faaolaolaina o tu ma aganuu a Samoa faapea le faatumauina ai o agatausili ma le tausaafia o Samoa i le va ma isi atunuu.
O le susuga I’oimataopunialavaa Vaito’a Toelupe o le Faatonu sa faavaeina le Onomea Productions ua faailoa lona agaga faafetai i le toe tuu atu o le talitonuga ma le faatuatuaga e faaauau ai e lana auaunaga, le tapenaina o tama’ita’i o le atunuu e sa’ili ai se tausala o Samoa, ma ua lagona ai lona agaga faagaeetia.
O le masina o Setema i le taimi o le Teuila e taualuga ai polokalame i le tauvaga e sa’ilia ai se tama’ita’i o le atunuu e avea ma tausala o Samoa, ma o le avefu’a foi lea a Samoa i tauvaga e sa’ilia ai se Tausala o le Pasefika i tausaga ta’itasi.
