I le amata ai o le polokalame faipaaga a le auaunaga a leoleo i Niu Sila ma le matāgaluega o leoleo i Samoa lea e to’alima leoleo mai Aotearoa ua malaga mai ma galulue ai i Samoa i lalo o lea polokalame, ua faamanino mai i aiaiga o lea faigāpaaga e leai se aafia o ia leoleo Niu Sila i ni galuega tau su’esu’ega poo isi lava galuega faalotoifale o loo feagai ma le tautua masani a leoleo i Samoa.
Ua aumai i se pepa o faamatalaga le autū o lea faigāpaaga mo le umi e 4 tausaga, ma e mafuli i le tuuina atu e leoleo o Niu Sila ua galulue i Samoa o fautuaga ma tuualalo i ni vaega e faaleleia o le galuega a le matāgaluega o leoleo e aofia ai le maua o tomai i le faia o su’esu’ega, le finauina o moliaga solitulafono i le faamasinoga, poo le vaega a le prosecution faapea isi matāfaioi tauave faaleoleo e mana’omia ai se fesoasoani.
O le afuaga o lea polokalame faipaaga ona o se talosaga a le malo o Samoa.
