Ua filifilia nei e le malo le afioga Vui Clarence Nelson na te tauave le tofiga o le Komesina o Sulufa’iga o se tofiga faalefaavae, ma o se filifiliga na faai’ugafonoina e le Kapeneta i le aso 28 o le masina na te’a nei o Me.
O le taualuga ai o galuega a le fono aoao i le po anapo ina ua pasia le tala o le tupe na faasilasila ai e le ta’ita’i o le Malo le afioga i le Palemia le filifilia o le afioga Vui sa ia tuua aloa’ia i le Aso Lulu o le vaiaso nei le galuega faamasino o le Faamasinoga Maualuga lea sa galue ai mo le 26 tausaga ma avea ai foi ma Faamasino Sinia o le Faamasinoga Maualuga.
O le filifilia o lea tamālii na pasia e le Palemene e ala i se lafo na faatū e le ta’ita’i o le malo ma ua ave ai ma le fautuaga i le afioga i le Ao Mamalu o le Malo mo le faamaonia o le filifiliga.
E pei ona silafia ua savalia nei le tolu tausaga o avanoa lea tofiga maualuga o le malo ina ua faamavae le ulua’i tama’ita’i loia sa ia tauaveina le afioga Luamanuvao Katalaina Sapolu.
O le tasi i le aoauli o le Aso Faraile o lenei vaiaso o le a faatautō ai le afioga Vui Clarence Nelson i lona tofiga o le Komesina o Sulufa’iga.
