E faapenei i le la vaiaso ua mavae le tumutumu o le fale taalo o le Gym 1 i Tuanaimato i le tauvaga o le taaloga siisii u’amea mamafa i le taamilosaga a le lalolagi le IBFC Universal Cup, lea sa tausiniō ai atunuu e 53 ma tausiniō ai alii ma tama’ita’i mai le vaega laiti, le autalavou ma le aumatutua.
O nisi sa tausiniō i taaloga a le Olimipeka, taaloga a Malo o le Taupulega ma taaloga a atunuu o le Oceania.
I le aotelega o lea tausiniōga, o Samoa ua tulaga muamua ma ua umia ipu o le vaega o alii ma tama’ita’i ma nisi ua maua pine auro, siliva ma le apa memea.
Sa maua foi faailogatupe e le ‘au a Samoa i le aofa’iga e 50 afe tālā tupe Ausetalia.
O Samoa i le tuuaofa’iga o pine na manumalo ai e 50, lea e 26 pine auro, 18 pine siliva ma le 6 pine apa memea.
O le tama’ita’i talavou o Seine Stowers e 8 pine auro na manumalo ai ma o ia foi na maua le ipu o le tama’ita’i siisii u’amea mamafa silisili ona lelei poo le best female lifter, sa ia maua foi le faailogatupe e 10 afe tālā Ausetalia.
O isi faailoga ua maua e le ‘au a le atunuu o le alii sili ona lelei lana sii i le tulagalua poo le second best ma le lifter, ma le alii laitiiti sili ona lelei lana sii i le vaega lua poo le second best junior lifter.
O le ‘ausiisii a tama’ita’i Samoa ua maua le faailoga o le ‘au silisili ona lelei i le taaloga siisii u’amea mamafa le best overall female team sa maua le ipu ma le faailogatupe e 20 afe Ausetalia.
E faapena i le vaega o alii na latou maua foi lea tulaga ma le faailogatupe e 20 afe tala Ausetalia.
Ua momoli ai le faafetai a le Pelesetene o le taaloga siisii u’amea mamafa i le tapua’iga a le atunuu aemaise o aiga a o alofaiva le ‘ausiisii a le atunuu i lea tausiniōga a le lalolagi sa talimalo ai Samoa.
Le afioga Tuaopepe Asiata Jerry Wallwork o le Pelesetene o le faalapotopotoga o taaloga siisii u’amea mamafa a Samoa ma le faalapotopotoga o loo avea ma faamalu o itutino o taaloga eseese i le atunuu le SASNOC.
Ua faailoa e Tuaopepe e tele matāti’a na tata’e e le ‘au a Samoa ae o loo faamaopoopo lea tulaga i le taimi nei ona faailoa lautele ai lea i se taimi lata mai.
