Ua aumai faalaua’itele le lapata’iga a se pule a’oga i mātua ma i latou uma o loo tausia fanauiti ina ia faaeteete ma faifai pea ona faamanatu i fanau gaioiga e tatau ona latou faia pe a taumafai se tagata e latou te lē iloa e ofo atu ni lole ma nisi meaalofa faapena ma taumafai e ave i latou i se taavale.
Ua māfua nei lapata’iga ona o se matāupu na tau tula’i mai i se tamaitiiti a’oga a le Snells Beach School i le taeao ananafi a o savali atu se tamaitiiti e aga’i i le a’oga, ae tu ane iai le van a se fafine ma taumafai e ofo i le tamaitiiti ni lole ma fai iai e oso i totonu o lana van.
Ta’ua e le leoleo satini, Roger Small, o se van pa’epa’e o se ituaiga fou na aga’i atu i le Dawson Rd, e latalata i Mahurangi East Rd, a o le’i ta le 9am i le taeao o le Aso Lua, o ananafi lea na tau tupu ai lea faaletonu.
O lea ua aga’i nei iai su’esu’ega a leoleo i lenei matāupu.
Saunoa le leoleo satini, e faafetaia le atamai o lenei tamaitiiti i le vave o lona mafaufau e faia le mea sa’o, ma faailoa i le faia’oga le mea na tupu i lena taeao, ma na vave ai foi ona logo e le a’oga leoleo a o le’i ta le 12 i le aoauli ananafi.
O le saunoaga lena a le pule a’oga, Kathryn Ramel, ma ia ta’ua ai le mea lea na taumafai lenei fafine ese e fai i le tamaitiiti a’oga, o le ofo ane o ni lole i le tamaitiiti ma fai iai e oso i totonu o lana van, peita’i na musu le tamaitiiti ma savali vave ese e taumafai ia oo atu i se aiga sa savavali latalata ane.
Ma o le toe faamanatu lapata’i lena a le pule a’oga i mātua, ina ia lē aunoa le faamanatu pea ia latou fanau gaioiga e tatau ona lototetele e fai pe a iai se tagata ese e taumafai e faapele latou i ni meaalofa, ni lole poo ā lava nisi mea e tau ofo ane; ia aua lava ne’i talia na mea.
O le faamanatu i fanau, ia aua lava ne’i feosofi i totonu o se taavale a se tagata e latou te lē masani ai, ae ia faavave ona aga’i ese atu i se vaipanoa saogalemu o iloa atu iai nisi tagata ma ia vave ona faailoa atu i se tasi e latou te maufaatuatuaina se taumafaiga a se tagata ese o tau fai ia latou.
Puna o Faamatalaga: https://www.nzherald.co.nz/nz/auckland/snells-beach-school-pupil-approached-by-stranger-in-van-offered-lollies-asked-to-get-in/7TUMT7CLCRBBJCZNWYCOJJRQFA/
