Ua taunuu le Faamasinoga Maualuga i se faai’uga ua saoloto ai se alii ave taavale sa ia faafoeina se loli la’u uta mamafa, sa molia i le ave taavale faatamala na mafua ai ona oo le maliu i se tama ua 59 tausaga o le soifua ina ua feto’ai le loli mamafa ma le van sa aveina e lē ua maliu.
O le sa’oloto o Nikolao Lafaele o Tafatafa Falealili mai le moliaga sa tuua’ia ai, ona ua lē mafai e molimau a leoleo na lagolago ai le solitulafono o le ave taavale faatamala na māfua ai le maliu, ona faamalieina le faamasinoga i aiaiga o le tulafono e mafai ai ona faamaonia se moliaga e aunoa ma se masalosaloga tatau.
Ua faalēaogāina ai i le faai’uga a le afioga i le Faamasino o le Faamasinoga Maualuga le afioga Fepuleai Ameperosa Roma le moliaga.
E to’aono sa molimau mo le itu a leoleo e aofia ai ni alii leoleo sa faia le su’esu’ega o le faalavelave tau taavale na tupu i le vaega o le alatele i le nuu o Malie o loo iai le patupatu poo le hump.
O le 4 o le afiafi o le aso 7 o Fepuari o le tausaga na te’a nei na tupu ai le faalavelave, a o aga’i mai i Apia le loli mamafa ma lana uta mulimuli ae aga’i atu i Sisifo le van.
Sa taumafai le aveloli e ta lana taavale i le itu o le auala o loo alu atu ai le van ina ua vaai atu ua lata i le ogatogtonu o le auala le van ma ua sopo’ia ai se vaega o le itu o le auala o loo alu atu aga’i i Apia.
Na taumafai e ta i le isi itu auala e ‘alofia ai se faalavelave peita’i na toe ta atu iai le van ma maua ai le itu agavale pito i luma o le loli pusasasaa pa’u sefulu ma aafia ai lē ua maliu.
Ua na o lē na molia na molimau e teena le moliaga a leoleo.
Sa tuua’ia e leoleo le sesē o le aveloli ae ina ua faamatala e lē na molia le taimi a o le’i tupu le faalavelave se’ia oo ina tupu, na taunuu ai le faamasinoga i le faai’uga sa faafoe le loli a Nikolao ma le faautauta ma ua lē mafai ai e leoleo ona faamaonia le latou moliaga.
