Ua avea nei le fale’aiga o le Tala Fine Dinning Restaurant mai Aukilani nei ma ulua’i falea’iga i le talafaasolopito o Niu Sila, ua mauaina le faailoga taualoa ua ta’ua o le Michelin Star.
E lē gata i lea matāti’a ae ua avea nei le fale’aiga ma ulua’i fale’aiga Samoa i totonu o Niu Sila ua mauaina lea faailoga tāua.
Ma ua auai atu ai nei Tala ma se tasi o sui ua aloa’ia i lalo o le Michelin Guide o Niu Sila i le tausaga lenei 2026.
O lenei fale’aiga o loo faatinoina e le alii kuka Samoa ia Henry Onesemo ma si ona to’alua ia Debby Onesemo, ma o se fale’aiga ua mafai ai ona faasoa atu e lea alo o Samoa ituaiga mea’ai Samoa ma nisi mai le Pasefika e faaaogā ai metotia ma auala faaneionapo i le gasesega o taumafa ma faaali atu ai i tagata lautele.
E pei foi ona ia faamanino o le igoa o le Tala, o le faamatalaina o tala, o tala i mea’ai poo taumafa Samoa ma le faatinoga i auala eseese i tulaga maualuga, faapea le lalolagi.
Na molimauina le tutulu o Henry Onesemo ina ua tauaaoina atu le faailoga ma faailoa atu ai e le Fofoga o le polokalame le avea ai o ia ma lana fale’aiga ma ulua’i Samoa ua mauaina le Michelin Star, ma o se matāti’a aupito i maualuga lea i tulaga o gasesega o mea’ai taumafa.
O le alii o Henry Onesemo e mai Malaemalu Falealili.
