O le Aso Toona’i nei, aso 20 Iuni 2026, o loo faatulaga ai e nisi o tamālii o Samoa se avanoa o le a feiloa’i mai ai le afioga ia Vaovasamanaia Winston Peters ma lana vaega faaupufai le NZ First ma soo se tasi o le mamalu o le atunuu i Aukilani e fia auai, ma o le a faia lea feiloa’iga i le Fale o Samoa i Magele, i le itula e 1pm i le aoauli.
O le tofa ia Pa’u Teleiai Edwin Puni o loo faamaopoopoina lenei feiloa’iga ma o loo avatu ai le valaaulia mo soo se tasi e maua le avanoa ina ia susū atu ma faalogologo i se faasoa mai foi a lenei tamālii e tusa ai ma fuafuaga o loo ia silasila iai auā se manuia o tagata lautele aemaise lava Samoa ma le Pasefika o loo nopia’i i Niu Sila nei.
E pei ona silafia, o le afioga ia Vaovasa ma le NZ First sa faatagisia foi e Samoa i le latou sa’iliga malo mo le sitiseni NZ lea ua taulimaina nei e o tatou mātua o ē ua agavaa mo lea faamanuiaga, ma na afio mai lava Vaovasa e fesilafa’i ma Samoa, o iinā na amata ai ona vaaia le lagolago mai o lenei tamālii i le faatalauula atu a Samoa.
Na savalia foi e le afioga Anae Arthur Anae ma nisi le Palemene a NZ i le matāupu i le visa 3 masina mo tagata Pasefika, ma o Vaovasamanaia foi le sui o le Palemene na afio ane e taulima le talosaga ina ia tuuina atu i le Palemene.
O loo ta’ua foi le finau ai o le National ina ia sii i luga le tausaga e faato’ā agavaa ai le tagata mo le penisione, mai le 65 o loo iai nei, ae ia tuu i luga i le 67, peita’i o le afioga foi ia Vaovasamanaia o loo finau malosi e teena lea suiga ae ia faatumau pea i le 65 tausaga o le soifua.
Ma le isi matāupu o loo finau malosi ai foi Vaovasamanaia ina ia sa’ili se lavea’iga i le taimi nei, o le tulaga faaletonu ua iai le kalapu lakapi a le Moana Pasifika, lea o loo to’atele fanau a Samoa o loo ave iai ina ia tapena ai mo lana Manu Samoa.
O le tele o le lagolago a lenei ta’ita’i i mana’oga ma faatalosaga a le Pasefika aemaise lava i le mamalu o Samoa i Niu Sila nei, ua tatau ai ma onomea ona toe maua se feiloa’iga ma lenei ta’ita’i, ina ia faalogologo atu a o faasoa mai ana fuafuaga uma o loo naunau ina ia faatino mo se lelei o tatou tagata ua avea Aotearoa ma o latou atunuu.
