Ua lata i le 9 masina talu ona tula’i mai le faalavelave i Motueka, na maliu ai se talavou e 27 tausaga le matua mai Samoa, o Talavini Saunoa Alatina, ae o lea ua tuuina mai iloiloga ma sa’ili’iliga a le pule o maliu (coroner) i le maliu ai o lea alii.
Ma e tusa ai ma le ripoti, na maliu Talavini i lona mānavaina o le asu mai le afi na aafia ai le fale na iai o ia e māfua mai ina ua mū se ulo faimea’ai na galo ona aveese mai luga o le ogaumu.
Na tula’i mai lea mū i le tausaga na mavae atu nei, i le aso 19 o Oketopa 2025, i se fale e nonofo ma aumau ai i latou o tagata galulue faavaitaimi.
I sa’ili’iliga a le pule o maliu, na faailoa ai e le’i iai ni faamaumauga ma ni vaega e iloa ai sa iai ni gaioiga faasolitulafono ma māfua ai lea faalavelave.
Na faailoa foi e le Pulega a le Tineimū ma Faalavelave Tutupu Faafuase’i, o se mū na tupu faafuase’i e le’i mafaufauina.
O le tasi o vaega e pei ona lipotia mai e le leitio faavaomalo a Niu Sila, na maua i su’esu’ega e le’i ola pe lelei foi ia faailo asu poo smoke alarms o le fale lea na aafia, e lē o mautinoa pe na aveese ia faailo asu a o le’i tupu le faalavelave.
Na faamanino foi e le pule o maliu, sa taumafaina ni ‘ava malosi e Talavini Saunoa Alatina, a o le’i tula’i mai lea mū.
Ua māua i lea ripoti, i ni nai itula a o le’i tupu le faalavelave na ia talanoa atu i si ona aiga, i lona to’alua i Samoa, ma faamatala le taavale na mafai ona ia faatauina, tulaga o lona fiafia tele i lea foi faamanuiaga, e tusa ai ma ana taumafaiga i lenei atunuu.
Faamauina le manatua ai e aiga ma uo, faapea tagata na galulue faatasi maTalavini, o se alii e finau ma galue malosi, o se tamā e alofa i lana fanau faapea si ona to’alua ma ona aiga.
Ua faaalia foi e le kamupani o faato’aga o loo galulue ai tagata o galuega faavaitaimi, o loo silasila toto’a i fale ina ia lelei ma malupuipuia mo i latou uma.
Ua tuuina atu foi faamaisega a le pule o maliu poo le coroner i le aiga faavauvau, ae ua ia fautuaina ai aiga uma i Niu Sila ia aua lava ne’i e alu ese mai ae tuu ai pea le ogaumu e ola i taimi o gasesega, ae ia mautinoa foi o loo ola faailo asu.
Puna o Faamatalaga: https://www.rnz.co.nz/news/crime-and-justice/648842/coroner-finds-motueka-fire-which-killed-samoan-rse-worker-caused-by-unattended-cooking
