Ua faamatala nei e le tama’ita’i o Everlee Wihongi le matua’i faigatā tele ma le telē o le aafiaga ia te ia ma lona aiga a o taofia ai o ia mo aso e 73 e le vaega a le ICE (Immigration and Customs Enforcement) i Amerika.
O se taimi muamua lea ua mafai ona faasoa ai e lea mafine ona faalogona talu ona tatala mai o ia i tua e le ICE.
Ta’ua e le tama’ita’i Kiwi e oo amai lava i le taimi nei e le’i mafai lava e se tasi o le auaunaga o femalagaa’iga ma vaega o tiute, poo le ICE māfua’aga tonu na taofia ai o ia, ae o le ā foi le tulafono na ia solia.
Ae ui i se taumafai a lea auaunaga e taofia le tama’ita’i o Everlee, na mulimuli ane faalēaogāina e le faamasinoga tulaga o lea matāupu ina ua sui le faai’uga o le moliaga o le umia o le maruana e lea tama’ita’i i le tausaga e 2016.
O lea na lē mafai ai loa e le ICE ona taofia pea Everlee.
I luga o upega tafa’ilagi na faailoa ai e Everlee lona agaga faafetai i lona aiga ma uo mo le lagolago, aemaise o tulaga o le maua o fesooasoani faaletulafono i lana matāupu.
Puna o Faamatalaga: https://www.nzherald.co.nz/nz/nz-woman-everlee-wihongi-speaks-out-after-horrific-73-days-in-us-immigration-detention/SRGSOWR4DJDJLLWOCMTNQTSYZA/
