E silia ma le selau afe ta’otoga ua mafai ona faatino i nisi o atumotu o le Pasefika i le fesoasoani a le malo o Niu Sila tauala atu i le Faalapotopotoga ua ta’ua o le “The Fred Hollows Foundation New Zealand”, ma ana paaga.
I faamatalaga mai le ripoti a le Leitio faavaomalo a Niu Sila na ta’ua ai, o se pine faamau o le galuega faifai pea ma le alofa a le faalapotopotoga mo tagatānuu o le Pasefika o le to’atele o tagata ua mafai ona faatino ta’otoga i o latou fofoga poo mata; aemaise o tulaga i ona aafiaga.
To’atele o ia atunuu e aofia ai Samoa, Fiti, Nauru ma Papua Niu Kini.
I totonu o le tausaga 2025 lava ia, na mafai ona faatino e lea faalapotopotoga le oo atu i le 114 o siaki e aga’i i tua poo outreach clinics, o faatalanoaga poo consultations na faatautaia e silia i le 64,000 ma ta’otoga e lata i le 5,000 i nofoaga ma nuu e maotua (remote communities), e lē o mafai ona maua pe laitiiti foi le avanoa e maua ai le fesoasoani i ni foma’i faapitoa i mata.
Faamatala e le Pule Sili o le Faalapotopotoga, le tama’ita’i foma’i, Dr Audrey Aumua, o se fiafiaga tele, ma o se faalogona uigaese le molimauina o le mafai ona toe faafoisia o le malosi i o latou mata ma le vaai; e pei ona faailo e nisi ua loa tausaga o feagai ma aafiaga ua tauāu ina po le vaai, ae ua toe manino nei le vaai atu i aiga ma fanau.
Ta’ua foi i ripoti, o loo faasolo foi fesoasoani i nisi o vaega i itu tau soifua mālōlōina i falema’i tuma’oti a atumotu o le Pasefika, e aofia ai le 21 o tausi soifua faamauina i matātā o mata (eye nurses) o le a faauu i le tausaga nei, ma foma’i mata o loo faasolo nisi o a latou polokalame faalea’oa’oga i Fiti ma Papua Niu Kini, ma le 11 o foma’i o loo faasolo a’oa’oga e avea ma foma’i faapitoa e mafai ona faatinoina ta’otoga i fofoga poo mata o tagata lautele.
O le tasi o galuega tele o loo faasolo nei o le faia ai lea o se nofoaga mautū mo le matātā i Papua Niu Kini i lona aai o Port Moresby – o le Papua New Guinea Centre for Eye Health.
Ma o se ulua’i nofoaga lea i lona ituaiga i totonu o le atunuu.
Ae ui i nei matāti’a eseese, ae ua faailoa e le tama’ita’i foma’i ia Audrey Aumua, o loo iai pea faafitauli ma lu’itau o loo feagai ma tagata o le Pasefika, e lē gata i gasegase i le fofoga, ae o loo feagai foi ma le faatupula’ia o ia ma’i e pei o fiva o ponaivi, faama’i o le HIV, ma faama’i lē pipisi.
Puna o Faamatalaga: https://www.rnz.co.nz/news/pacific/620490/how-kiwi-generosity-is-helping-fund-life-changing-eye-surgeries-in-the-pacific
