O loo iai le faanaunauga a se vaega o Kapa Haka mai Brisbane i Ausetalia, e tauva i se aso i le tauvaga tele o Kapa Haka i totonu o Niu Sila.
E lata i le 40 sui o le vaega e ta’ua o Te Rau Aroha na malaga mai Ausetalia i Tauranga e maimoa i le National Secondary Schools Kapa Haka Competition ma saga faamausalī ai o latou sootaga ma le aganuu Māori.
Na faatūina le vaega i le tausaga e 2024 ina ia fesoasoani i tupulaga Māori o loo nonofo i Ausetalia o taumafaiga e faaolaola pea lo latou gagana, aganuu, ma lo latou faasinomaga.
Ta’ua e le tama’ita’i 16 tausaga, o Mystic August-Povey, ua fesoasoani le Kapa Haka ia te ia e toe maua ai le avanoa e toe faamausalī ai lona sootaga i lona faasinomaga Māori ma ua avea ma ua faaosofia ai foi lona fia auai i ia tauvaga aemaise i tulaga maualuluga i Niu Sila.
Na ta’ua foi e le tasi o sui, Nacoby-Jae Whit, ua fesoasoani lenei malaga ua ia malamalama ai i le gagana Māori, tu ma aga, ma le talaaga o lona atunuu, ma ua ia una’ia ai isi tupulaga Māori o loo nonofo i fafo e aua ne’i fefefe e toe foi e a’oa’o ma faaolaola a latou aganuu.
Ta’ua e se tasi o sui na faavaeina le vaega, Braxton Hohepa, e tāua tele le iai o se nofoaga e mafai ai e tupulaga Māori ona lagona le sa’oloto e faaali atu ai o latou tu ma aganuu o o latou faasinomaga ma fesoasoani e faasaoina ai le aganuu Māori mo tupulaga i le aga’i atu i le lumana’i.
Na saunoa foi le ta’ita’ifono, Emma Carter, e to’atele tagata ua manatu ifo ua mou atu sootaga a tagata Maori o loo nonofo i Ausetalia ma lo latou aganuu, peita’i o loo ola ma mausalī lava tulaga o iai le aganuu i totonu o Ausetalia.
O le faamoemoe o le vaega, ia iai se aso e mafai ai ona faatū aloa’ia i Ausetalia se vaega o Kapa Haka, ina ia mafai ai e tupulaga Māori o loo nonofo ai ona tauva i tauvaga tetele a Niu Sila.
Ae mo le taimi nei, o loo faatino pea ma le agaga fiafia le a’oa’oina atu o fanau ma tupulaga ma taumafai ia tupu ma ola lea vaega, sau se aso faataunuuina ma le manuia moemitiga o loo iai.
Puna o Faamatalaga: https://www.rnz.co.nz/news/te-ao-maori/657456/australian-based-haka-ropu-dreams-of-taking-nz-national-stage
