I le siitia o le aofa’iga o tagata o le itumalo o Safata i le 10,457 e agavaa i le taui tupe mai le 10 miliona tālā ona o aafiaga mai le manuao o le malo Niu Sila o loo goto i gataifale o le itumalo, o le itu mautinoa e silia i le 10 miliona e faaalu ai i le vaevaega e tasi le afe selau tālā a le tagata e to’atasi mai le pepe e oo i se tagata ua aulia tausaga ua avea ai ma matua tausi.
Ua faailoa mai e le Minisita o le Matāgaluega o Puna’oa Faalenatura ma Si’osi’omaga o loo iai le faasoaina o le 10 miliona, o le a tumau pea ona maua e le tagata e to’atasi o lea itumalo le aofa’iga o le taui tupe e tasi le afe selau tālā.
O loo iai le 4 miliona tālā o loo totoe mai le vaegatupe tupe e lima miliona na muamua aumai e le malo o Niu Sila mo galuega o le faamamāina o le si’osi’omaga o le gataifale o lea itumalo ina ua tuana’i le goto o le manuao ia Oketopa o le tausaga e 2024 ma ua faaalia ai e le minisita le tofa Ale Vena Ale, o le tupe o loo totoe o le a faaaogā ai le silia i le miliona e faalava ai le faasoaina o le taui ua mae’a ona fuafuaina mo tagata o le itumalo o Safata.
Le afioga i le Minisita o le Matāgaluega o Puna’oa Faalenatura ma Si’osi’omaga i se fesoota’iga i le po anapo, le tofa Ale Vena Ale.
