Ua tuua aloa’ia nei le tofiga Faamasino Sinia o le Faamasinoga Maualuga a Samoa e le afioga Vui Clarence Nelson, ina ua mālōlō litaea mai ona tiute sa ulua’i galue i le Faamasinoga Maualalo a Samoa le Magistrate Court lea ua suia nei i le Faamasinoga Faaitumalo, sosoo ai ma le avea ma faamasino o le Faamasinoga Maualuga.
I le 26 tausaga o lana tautua i le faamasinoga a le atunuu e ala i le tofi faamasino, o le tausaga e 2000 na ulua’i avea ai ma faamasino.
Na mae’a le 6 tausaga sa galue ai i le Faamasinoga Faaitumalo, see atu i le Faamasinoga Maualuga i le tausaga e 2006, ae o le masina o Novema o le tausaga e 2021 na siitia ai lona tulaga i le avea ma ulua’i faamasino o lea faamasinoga e tauaveina le tulaga o le faamasino sinia o le Faamasinoga Sili a Samoa.
O le Aso Lulu o lenei vaiaso na faia ai se tauaofiaga faapitoa a le faamasinoga e aloa’ia ai le mae’a o le taimi galue o le afioga Vui Clarence Nelson.
O se sauniga sa auai le Ofisa Sili ma le aufaigaluega a le Matāgaluega o Faamasinoga ma le Faafoeina o Matāupu Tau Faamasinoga, ae sa auai foi le Loia Sili ma sui o le sosaiete a loia aemaise o le faletua ma alo o le afioga i le Faamasino Sinia ua mālōlō litaea.
A o avea lea tamalii ma Faamasino sa filifilia o se sui o le komiti a Malo Aufaatasi o loo māta’itūina le feagaiga faavaomalo o aiā tatau o fanauiti le United Nations Committee for the Rights of the Child.
O se isi lea o matāti’a na ausia e lea tamalii ma avea ai o ia ma ulua’i tagata mai le Pasefika ua avea ma sui o lea komiti a Malo Aufaatasi.
O le vaiaso na te’a nei na faia ai se tali faaaloalo a le sosaiete a loia i Samoa e faafetaia ai le tautua a Vui e lē gata i le tomai faaloia, ae o lona avea ai ma Faamasino o le faamasinoga a le atunuu.
