E tolusefulu moliaga o gaioiga solitulafono e fesootai i le faaaoga o tupe eleelea poo money laundering, ua molia ai e leoleo taulele’a e toalua o James Atua ma Fred Papalii.
O moliaga faaopoopo ia a leoleo mai suesuega i ni sootaga i Samoa agai i le faalavelave i le atunuu o Vietnam lea o loo molia ai ni alii talavou mai Samoa.
Na faailoa e le loia a leoleo ia moliaga faaopoopo ina ua toe tutulai James Atua, Fred Papalii ma le tamaitai o Nikitah Charles i le Faamasinoga Faaitumalo i le Aso Lua. O isi moliaga o loo molia faatasi ai faia; o se gaioiga faaalātua ma le tuuina atu o faamatalaga sesē i leoleo.
O le Aso Gafua asau e valaau ai moliaga o tupe eleelea i le Faamasinoga Maualuga lea o le a toe tutulai ai James ma Fred lea ua faaauau pea ona taofia i le vaaiga a leoleo, ma le la talosaga e tatala i tua o le a tagofia e lea faamasinoga.
Ae i moliaga o le tuuina atu o faamatalaga sesē i leoleo ma le faia o se gaioiga faaalātua o le masina o Setema e suesue ai molimau ina ua tuuina atu e loia o loo tutulai mo i latou e toatolu o loo molia tali tete’e i ia moliaga.
O le tamaitai o Nikitah Charles ua ia faailoa i le faamasinoga ua 22 vaiaso o lona ma’ito ma ua fautuaina ai e le faamasinoga e tuuina atu e lana loia se talosaga e tuua ai taualumaga a le faamasinoga mo le malaga i fafo pe a iai nisi tulaga e aafia ai i lona ma’i taga a o faatali ai Setema e suesue ai moliaga o loo molia faatasi ai ma James Atua ma Fred Papalii.
