E lata i le sefulu afe tālā na maua i le aso muamua o le taufetuliga sa’ili tupe mo le tausia o fanau sauāina i le nofoaga o le Campus of Hope, lea o loo faatino e ni alii taalo mai Ausetalia, o ni alo o Samoa mai le kalapu o le A1 training club.
Ua faailoa e le faalapotopotoga o le Toomaga mo ē Puapuagatia le alofagia e le atunuu o le faamoemoe i le lima foa’i ma le aao māfola o tagata a o faagasolo le taufetuliga na amata mai Tuanaimato i le nofoaga o le Campus of Hope ma aga’i atu i Sisifo o Upolu.
E 5 afe 700 ma ona tupu tālā na maua i foa’i mai tagata eseese sa alolofa ane ma le 2 afe 950 tālā tupe Niu Sila na maua i seleni sa faameaalofa ane e faaaogā ai fesoota’iga televavave le online.
O le Aso Lua o le vaiaso nei na amata ai lea faamoemoe ma o loo faaauau pea, ae o le aso muamua na ausia ai i le taufetuliga le mamao e 38 kilomita.
