O le a toe silasila le Matagaluega o Leoleo, Falepuipui ma le Toe Fuataina i ata o tagata o loo latou faasalalau pe a mae’a ni osofaiga e maua ai fualaau faasāina e pei o le ‘aisa ma le maruana. Ua aumai lea finagalo o le Sui Komesina o Leoleo, Falepuipui ma le Toe Fuataina ina ua fesiligia e tusitala i le Aso Lua, i ata o se tamā ma sona atalii sa faailoa ma isi tagata i luga o le upega tafailagi a le matagaluega, ae e leai ni fualaau faasaina na maua i le fale o lea tamā ma lona atalii, ae sa agai iai le sailia o nakoti. Ua nao se laau malosi e lei laiseneina ma ni ututau na maua ai.
O le finagalo o le Sui Komesina i le feiloaiga ma tusitala i le Aso Lua na ia faailoa ai foi ma le toa luasefulu fa o tagata ua molia i solitulafono o le umia o ‘aisa ma maruana poo fualaau faasāina mai osofaiga sa faatino talu mai le aso 16 o le masina ua mavae atu nei o Me.
O le 24 lea e aofia ai alii e toasefuluiva ma tamaitai e toalima. E le gata na maua ‘aisa ma maruana ae na maua ai foi i ia osofaiga ma mea faitino e fesootai i le faaaoga o fualaau faasāina. Ua faailoa ai e le Sui Komesina e le toe solomuli le latou galuega ma ua iai le vaega ua feagai ma le mataituina o gaioiga e fesootai i fualaau faasāina e aofia ai nisi o Matagaluega a le malo.
Ua ia faailoa foi o vaa feoai i le sami e aofia ai ma vaa fagota e le o toe ela ai le vaai a leoleo i le mataitu lelei o a latou gaioiga uma ina ia mautinoa e le afea Samoa i ni faiga solitulafono e taupulepule lelei mo le feaveaiina o soo se ituaiga o nakoti poo fualaau faasāina.
