Ua avea nei Dr Ailsa Wilson ma uluai tamaitai Pasefika i totonu o Niu Sila nei, ma foma’i tipitipi o ponaivi poo le vaega ua ta’ua o le orthopaedic surgeon ua faamae’aina lelei ana aoaoga i lalo o le polokalame o foma’i faapitoa o ponaivi, le New Zealand Orthopaedic Association’s five-year specialist training programme.
O le tamaitai o Ailsa na soifua mai i Tokoroa; faamatala e le tamaitai foma’i na mua’i tilotilo e avea o ia ma se tagata ta piano i koneseti tetele, ao faasolo ai ana aoaoga i le matātā tau musika, ma taaloga i lona itu faasaienisi, le music and sport science i le Iunivesite o Aukilani. Ae peita’i na suia atoa lona mafaufau e avea ma foma’i ina ua iai sona malamalamaaga i lea foi matafaioi aemaise o le faaosofia o lona fiafia i lea foi matātā i le toatele o fanau maori ma le Pasefika o loo aoaoga ma saili manuia i lea galuega o le faafoma’i.
Ina ua faauu mai i le tausaga 2013, na amata galue mo le falema’i i Middlemore a o lei ulufale atu mo aoaoga ma i itu tau ponaivi i le tausaga 2021. Faamauina, mai i ia aoaoga ma taumafaiga o lea na maua ai le avanoa a Wilson e agai atu i nisi o falema’i i Tauranga, Ueligitone, Hawke’s Bay, North Shore, and Middlemore.
Faamatala e le foma’i lagona o le faagaeetia ma le fiafia tele i le mafai ona ia ausia o lenei matati’a maualuga, e le gata ia te ia a o le toatele o tagata Pasefika ua ia molimauina le maoa’e o taumafaiga i lenei matātā o le faafoma’i ma le finau i itu e avea ai ma foma’i faapitoa.
E pei ona faailo o lea ua toavalu tamaitai fomai tipitipi o ponaivi ua ulufale atu mo lea polokalame faapitoa, talu ona ia amata mai i lea polokalame.
Faaopoopo Wilson, o se matati’a ina maualuga i lona silasila, ma o le agaga faafetai o le mafai e tagata pasefika ona ausia ia avanoa aemaise o le faatupulaia ai o le numera o tagata ma faasinomaga eseese i lea matātā faafoma’i i totonu o Niu Sila.
