O le Ofisa o le Loia Sili a le malo ua faaauala atu ai se lapataiga malosi mai le faamasinoga, mo le galuega a leoleo ia faatāua ma amana’ia aiā tatau o soo se tagata e taofia atu ma molia i ni tuuaiga o gaioiga solitulafono.
O lea lapataiga ua faia e le afioga i le tamaitai Faamasino le afioga, Alalatoa Rosella Papalii, e mafua i se talosaga a le alii loia le afioga, Fuimaono Sefo Ainu’u na ia faailoa ai le teena e leoleo o le talosaga a se taule’ale’a o loo ia tulai ai, ina ua manao e talanoa i se loia ina ua taofia atu mo suesuega.
O lea alii loia o loo tulai mo Fred Papalii o se tasi o le toatolu o loo tuua’ia i ni moliaga mai suesuega a leoleo i ni sootaga i Samoa, i le fa’alavelave i le atunuu o Vietnam, o loo molia ai ni alii talavou mai Samoa.
O le saunoaga a le tamaitai faamasino e le tatau i leoleo ona teena le avanoa mo se tagata e molia pe a talosagaina le fia maua o se loia.
O le aso 13 o Iuni na taofia ai e leoleo Fred Papalii lea o loo mafua ai le faaseā a le alii loia o loo tulai mo lea taule’ale’a.
