Ua avea nei le maota o le afioga i le Tama’aiga le afioga Tui Atua Tupua Tamasese Efi i Tua’efu ma se tasi o fale mata’aga poo se museum i Samoa, ua faalauiloa ai nisi o tala faasolopito o taimi o pulega faakolone a Siamani ma Niu Sila i Samoa, ae o taimi o sailigāmalo mo se tutoatasi o le atunuu mai ia pulega faakolone.
O le aso Toonai na tea nei na tatala ai le Fale Mata’aga ma o se nofoaga e pei ona faailoa i se lipoti a le nusipepa o le Sunday Samoa o le a avea ma se tasi o punavai o suesuega mo alo ma fanau a le atunuu latou te iloa ai tala o mea sa tutupu i tausaga e tele ua mavae, ma taumafaiga a e sa lotolotoi i le taitaiga o le malo.
O le maota i Tua’efu o se tasi o fausaga o fale i onapo o pulega a Siamani i Samoa ma sa fausia e le tofa Taisi Olaf Nelson o le tua’a o le tina o le tama’aiga, o se isi o taitai sa faamaopoopoina le Mau i taimi o le malosi o pulega a Niu Sila.
O loo iai le talitonuga toe pau lea o fausaga o maota mai na onapo o loo iai pea i le atunuu, auā o le tele o fale o ia fausaga sa iai, aemaise o maota o ia fausaga sa faaaoga e le tatou malo i tausaga ua mavae ua le o toe iai.
O nisi o maota sa avea ma vaaiga o taimi o pulega faakolone sa i le taulaga o Apia, ae ua tala i lalo ma ua suia i fausaga o fale faaonapo nei.
Ua 103 tausaga le matua o le maota o le Tama’aiga i Tua’efu ma le o le tausaga e 2008 na faatupe ai e le malo galuega na toe faaleleia ai nisi o vaega o le maota a o avea le afioga Tui Atua Tupua Tamasese Efi ma Ao o le Malo.
