O taimi o le faigāmalo a le vaega e puipuia aiā tatau a tagata i le Paeaiga 16 a le Palemene na amata faatalanoa ai le tuufaatasi o le pulea ma le vaaia o eleele o le malo i se auaunaga e tasi.
Na faaauau ai lea galuega i le ulua’i faigāmalo a le vaega faaupufai o le Faatuatua i le Atua Samoa ua Tasi i le Paeaiga 17 se’ia oo mai i le Paeaiga 18 o iai nei lea ua avatu ai le tulafono e aloa’ia ai le faatūina o le Matāgaluega o Eleele ma Fuagafanua.
O le tulafono taufaaofi lea na taualuga iai galuega a le fono aoao faitulafono i le Aso Faraile ua mavae, ma ua pasia lona faitauga faalua ma ua faasee atu e toe iloilo e se komiti faapalemene a o le’i toe foi i le maota fono mo le faitauga faatolu mo le pasiaina.
O eleele sa i le vaaiga a le Matāgaluega o Puna’oa Faalenatura ma Si’osi’omaga, o eleele sa i le Faalapotopotoga o Eleele a Samoa, ma fanua sa i le Faalapotopotoga o le Esetete Tausi ua tuufaatasia uma i lea tulafono, ma o le a i le vaaiga a le matāgaluega fou o eleele ma fuagafanua.
Ua tolopo galuega a le fono aoao e toe tauaofia i le aso 18 o le masina o Aokuso.
