Ua faailoa faanoanoaga o le aiga o le teineititi e 17 tausaga le matua mai Thailand lea na maua lona tino maliu i se atopa’u lea ua molia ma pu’eina ai se alii mai Ausetalia.
Fai mai leoleo e pei ona lipotia e le CNN na o latou pu’eina le alii Ausetalia lea, e 40 tausaga le matua i le malae vaalele i Bangkok i le Aso Toona’i ae o le faalavelave na tupu i le itu i Sasa’e o Bangkok.
O lē ua masalomia i le faalavelave lea ua faailoa e le CNN o Simon Peter Carman ma ua feagai nei ma moliaga o le fasioti tagata, nanāina o se tinomaliu ma isi moliaga.
Fai mai leoleo Thailand na o latou iloiloina ata mai le CCTV o loo iloa atu ai Carman o loo aga’i atu i se nofoaga ma lē ua maliu ae toe vaaia mulimuli ane na o ia o loo aga’i ese mai ma lea nofoaga faatasi ma le atopa’u ae ua leai le tama’ita’i e pei ona feta’ua’ina.
I tusitusiga a leoleo i lana itulau o le facebook ua faailoa ai na aga’i atu le alii lea ma le atopa’u i le uilaafi sa ia faaaogāina aga’i i se nofoaga vaoa e lata i le auala o le train.
Na pu’e e leoleo i se taimi mulimuli ane mai le malae vaalele a o sauni e toe pu’e ane lana vaalele i Ausetalia.
Puna o Faamatalaga: https://edition.cnn.com/2026/06/28/asia/thailand-teen-girl-suitcase-death-australian-arrested-intl-hnk
