O se vaaiga uigaese ma o se tulaga e le’i vaaia muamua i taaloga o le lakapi i Samoa le taaalo faatasi ai mo se ‘au e tasi o se tinā ma se tasi o lana fanau.
Ae peita’i i lenei tausaga ua tata’e e le ‘au ta’ito’a sefululima (15) a le Manusina, ina ua māua faamatalaga i le taaalo ai o le tama’ita’i o Masuisuimatamaalii Tauasa-Pauaraisa ma si ana tama teine o Marilyn-Rose Pauaraisa.
O se talafaasolopito lea i le taaloga lakapi, aemaise o le taaalo faatasi ai i se taaloga faavaomalo.
O Masuisuimatamaalii Tauasa-Pauaraisa, o se tasi ua loa lana tautua i le ‘au a le Manusina e pei ona ia kapeteniina ai le ‘au.
E le’i leva atu ona mae’a le faatasiga o le tufatufaga faailoga taualoa mo taaloga lakapi le “Pasifika Rugby Hall of Fame lea na maua ai e lea tamalii le faailoga o le Seiuli Fiao’o Fa’amausili Women’s Player of the Year.
O se tama’ita’i ua tele taaloga ua fai ai ma avefu’a a Samoa, e lē gata i taaloga ta’ito’a sefululima ae faapea le ta’ito’afitu, faapea foi i taamilosaga iloga ma aupito i maualuga ua ta’ua o le Farah Palmer Cup ma le Melbourne Rebels.
Faaalia e le tama teine a Masuisuimatamaalii, o Marilyn-Rose o se faalogona uigaese, ae o se vaega ua ia iloa ma malamalama lelei iai, ona sa o la taaalo faatasi i taaloga o kalapu lakapi, peita’i o le maua ai o le avanoa e taaalo ai i tulaga faavaomalo o se itu ua ia tilotilo o se avanoa lē aumaua ma ua maua foi ia te ia le agaga faagaeetia o le mitamita ma le fiafia tele aemaise o le lagona mafanafana i le iloa o loo iai lona tinā ma ia.
O le ulua’i taaloga na taaalo faatasi ai i la’ua nei o le taaloga ma le ‘au a Tonga (LofaXV) i le malaetaalo o le Churchill Park i Lautoka.
Na manumalo ai le Manusina i ‘ai e 50 i le 5 o ‘ai a Tonga.
