Ua lipotia mai nei e le leitio faavaomalo o Niu Sila le faalēaogāina ai e le faamasinoga i totonu o Amerika o le moliaga a le tama’ita’i Niu Sila o Everlee Wihongi ua faitau masina talu ona taofia e le vaega a le ICE.
Mo le silafia o lenei matāupu sa tula’i mai ina ua toe taliu atu Everlee i Amerika, mai lona asia ai o Niu Sila nei, o lea na taofia ai le tama’ita’i ona o se sasi i le lē faamaoni o Everlee i le lē faailoa o sona aafiaga i le tulafono i se taimi ua sola.
E pei ona iai se matāupu na molia ai o ia i lona umiaina o se fuālaau faasāina o le maruana i le silia ma le 10 tausaga talu ai.
O Everlee o se sitiseni Niu Sila, ae peita’i ua autausagā o nofo o ia i totonu o Amerika.
Lipotia mai i se tusitusiga a le to’alua o le tuagane o le tama’ita’i ia Everlee, ia Courtney Wihongi na ia faailoa ai le tulaga ua iai, le faalēaogāina ai lea e le faamasinoga o lona moliaga e tauala atu lea i le lē talia ai e le faamasinoga o se maliega na faia e le va o le tama’ita’i ia Everlee ma le itu a leoleo, talu ai foi se faalētonu o le loia na tula’i mo le tama’ita’i o Everlee i lena taimi.
Faailoa e le aiga o Everlee, o le faalēaogāina ai o lenei moliaga e mautinoa le lē tatau ai i lalo o le tulafono ona taofia pea e le ICE ia Everlee.
Faamaonia e le loia o loo tula’i mo Everlee, o lea ua faalēaogāina le moliaga a Everlee ma o loo iai le faanaunauga ia vave tatala mai i tua lea tama’ita’i.
Comments
Loading comments…