O se aso faanoanoa lenei i le usua’i atu o le fanau a’oga a le Rangiola High School i Canterbury ma maua se tala faanoanoa i le uma ai faafuase’i o le ola o se tama a’oga o le Tausaga 11, ina ua aafia mai se taavale na lavea i se magāala i North Canterbury, i le Loburn Whiterock Rd i le taeao o le Aso Toona’i na se’i mavae atu nei.
Na ta’ua e le Satini Sinia, Chris Wakelin, e to’atasi ua ma’umau ai le soifua mai lea faalavelave tau taavale, ae o loo manu’a tigāina le isi.
O si tamaitiiti a’oga lenei ua maliu e faamatalaina e le pulea’oga, Bruce Kearney, o se tamaitiiti e mata’ina ona uiga lelei i le a’oga, ma o le a matuā misia o ia i totonu o le a’oga e lē gata i tamaiti a o faia’oga foi.
Saunoa le pule, o le uma faafuase’i o le ola o lenei tama a’oga, ua matuā lagona ai le faavauvau i totonu o le a’oga, ma o le a faatulaga ni fesoasoani i totonu o le a’oga e avatu ai le lagolagosua i fanau a’oga ae faapea foi i faia’oga ua mafatia lagona i lenei tala faanoanoa.
Sa faaleo foi faamaisega ma faamafanafanaga a le pulenuu o le aai, Dan Gordon i aiga o le tamaitiiti ua maliu faapea le a’oga.
Sa momoli foi le faafetai ma le faamalo a le pulenuu i auaunaga uma o faalavelave faafuase’i na tali atu i le nofoaga na tupu ai le faalavelave.
E tusa o le 10.25am i le taeao o le Aso Toona’i lea na lavea ai le taavale i Loburn Whiterock Rd, e latalata i le fetaula’iga ala o Barkers Rd, i le 11kilomita i le itu i Mātū o Rangiora.
Puna o Faamatalaga: https://www.newstalkzb.co.nz/news/national/fantastic-young-man-school-mourns-canterbury-student-killed-in-crash/
