Ua faailoa mai nei e sui ua ta’ua o Poverty advocates tulaga o le to’atele o fanau a’oga ua vaaia le aga’i e sa’ili galuega ma ua faigaluega foi ina ia latou fesoasoani atu i tulaga pagatia ua iai o latou aiga, ona o le taugatā tele o le soifuaga ua iai nei.
Ma o se tulaga ua faaalia ai atugaluga talu ai ua tauāu ina aafia ai le ola mālōlōina lelei o le tamaitiiti aemaise o lona ola a’oa’oina.
I se tasi o matāupu o loo faaalia ai se talavou Samoa e i le Vasega 13 i le A’oga Maualuga o Papakura High School, e igoa ia Sam Saega lea na faailoa, e oo atu i le 20 itula i le vaiaso o loo galue ai i se faleoloa poo se supamaketi.
Ua māfua ona o lona mana’o e tuu atu lona tau’au e fesoasoani i si ona tamā ma si ona aiga to’a sefulu ma le tasi.
Ta’ua e lenei talavou, o le vaai alofa lava i si ona tamā lea na māfua ai ona ia aga’i e sa’ili se galuega.
Faamauina o le tuaa o Sam o se ave taavale o le Uber ma e faatau foi ana kekepuaa e taumafai ina maua se seleni e tausi ai lo latou aiga.
I ripoti mai le Child Poverty Action Group i le tausaga e 2024 o loo faamauina ai e lata lava i le 15,000 tupulaga talavou o loo galulue mo le 20–50 itula i le vaiaso ona o aafiaga i le tamaoaiga.
Ma i ia faamaumauga na māua ai o le tetele o itula e galue ai le talavou e fai lava sina ogaoga o aafiaga i taumafaiga a fanau i a’oa’oga.
Faamanino e le sui o le Auckland Action Against Poverty, Agnes Magele le telē o le aafiaga e pei o le utiuti o avanoa a fanau i itu tau a’oa’oga o le a latou maua ma faigatā ai ona ausia fuafuaga i se lumana’i lelei talu ai le alu o le mafaufau i aafiaga o le aiga.
Mo le a’oga a Papakura High School, o loo ta’ua e le Pacific Liaison, Lesieli Samiu pe ā ma le 40% o fanau a’oga o Vasega 12 ma le 13 o loo galulue e fesoasoani i o latou aiga.
E ui i tulaga faigatā o loo feagai ma ia ae o loo maualuga lava ona moemitiga ma faamoemoega e faaauau ana a’oa’oga e aga’i atu i le iunivesite, mo se lumana’i lelei o ia ma lona aiga.
Puna o Faamatalaga: https://www.rnz.co.nz/news/education/597505/more-school-students-working-to-pay-family-bills-says-poverty-advocate
