I le amatalia ai o le tausaga faaletupe fou i lenei masina o Iulai ma faagasolo ai ma le faatinoina o fuafuaga o le atinae manuia o Samoa e ala i le Tala o le Tupe ua pasia e le palemene, ua faailoa e le ofisa o le malo o Ausetalia i Apia le iai o lana lagolago i le tala o le tupe 2026 i le 2027 i le vaegatupe e 10 miliona tupe Ausetalia e maua ai le 19 miliona 200 afe tālā Samoa.
Ua faailoa ai foi e le ofisa o lea malo lana fesoasoani e siitia le tulaga i le maua o le eletise mo nisi o nuu ma afioaga e faaaoga ai malosiaga faafouina mai le la e ala i le fausia o nofoaga e pu’e ai le malosi o le la ma gaosia ai le eletise o le a maua ai e aiga e selau lea auaunaga tāua faapea ma maota e lima o loo tapuvae tasi iai mafutaga a nisi o nuu ma afioaga.
O lea galuega o loo taulamua ai le kamupani o le Sun Pacific Energy i se faigapa’aga o loo vaavaalua ai ma le faalapotopotoga o le malosi tau eletise, ae lagolago iai le UNICEF i lona faatupeina. O nisi o nuʻu ua afea i le eletise maua i le la mai lea fesoasoani o Apolima Tai, Vaisualua i Faleasiu, Elise ma Vaiusu, o Tāfitoala ma Tafaigata.
I se tasi o lagolago a le malo o Ausetalia ile tausaga faaletupe fou ua faagasolo o le polokalame o le malo grant lea e le gata i le opogi ma lagolago ai o le maua o le eletise mai malosiaga faafouina ae ua fesoasoani ai foi i le tapenaina o le itu i taumafa maua pea mo le tausiga o le soifua o tagata. O tupulaga talavou o le afioaga o Pu’apu’a ua latou faato’a ai nisi oo latou eleele i ma’umaga talo ma fualaau’aina faisua ma isi laau tau faatoaga e vave ona selesele ma faaaoga.
