E silia ma le 700 afe tālā o le a faatupe ai i le polokalame fesoasoani a le malo o Iapani le faaleleia o le falea’oga o le kolisi o le itu o tane ma le faaopoopoga o le falea’oga tulagalua o le afio’aga o Faleaseela.
O sui o ia a’oga e lua sa auai i le sainigalima e faamautū ia fesoasoani lea o le a maua ai e le kolisi a le Itu o Tane le $370,354 tālā ae o le a’oga tulagalua a Faleaseela e $365,681 tālā e faatupe ai galuega o falea’oga.
Ua faailoa e le ofisa o le malo o Iapani i Samoa talu ona amata lana polokalame fesoasoani i le tausaga e 1991, ua 230 talosaga ua talia mo fesoasoani, ma o le 150 o ia talosaga uma o le fausia ma le faaleleia o falea’oga i Samoa.
O talosaga ua tuuina atu mai le masina o Aperila o le tausaga nei e oo atu ia Mati o le tausaga fou 2027 e sefulu ma o a’oga uma na tuuina atu ai ia talosaga.
Ua faailoa e le malo o Iapani le faaauau pea o ana fesoasoani mo le atina’e o le lautele o tagata e ala i taumafaiga eseese aemaise o le faaleleia o falea’oga auā le a’oa’oina o fanau a le atunuu.
