O le faai’uga o le vaiaso talu ai na faatautaia ai se tasi o faatasiga tele mo faipelega i totonu o Amerika, ua faaigoaina o le Indiana Boxing Hall of Fame.
Ma o se mitamitaga tele le filifilia ai o le alo o Samoa ua iloga i taaloga faipelega le afioga To’aletai Faumuinā David Tua.
O lenei faaaloalo, ua amana’ia ai le sao tāua o To’aletai David Tua i ana taumafaiga ma le mata’ina o lana fusu, aemaise o ia o se tasi na matua’i maoa’e ana taaloga i lana ‘aupaga mamafa poo le heavyweight boxing division i lona vaitaimi.
O lenei faaaloalo, ua faaopoopo atu lea i nisi foi o matāti’a e pei ona iai le Atlantic City Boxing Hall of Fame (2023), Florida Boxing Hall of Fame (2022), ma le U.S. National Boxing Hall of Fame (2020).
I se pepa o faamatalaga mai le Independent Boxing Samoa (IBS), e ui ua mae’a le isi o laasaga i le ola tautua o To’aletai Faumuina David Tua i totonu o le maea, ae o loo molimauina pea lona tautuaina o le atunuu e ala i lona fesoasoani atu lea i fanau lalovaoa o Samoa i le atina’e o le taleni o le faipelega a le a’oga o le IBS Academy.
E pei ona iai se tasi o taamilosaga o le Youth World Boxing Cup i le masina o Mati, lea na galulue soosootau’au ai faatasi ma le ‘aufaipelē a Samoa a o faatautaia lenei taamilosaga o le Ipu i Fiti, lea na foi mai ai Samoa ma pine e 19.
Faailoa e le Peresetene o le IBS, Tavu’i Mike Lemisio, le telē o le sao o To’aletai i le taaloga ma fanau fai mai mo lenei taleni e lē gata i Samoa ae faapea foi le Pasefika.
E momoli atu ai le faamalo a le tatou Radio Samoa, i lana afioga To’aletai Faumuina David Tua.
Puna o Faamatalaga: Samoa Boxing Press Release
