Ua ioeina e le asosi o fanau a’oga a le Iunivesite a Canterbury o i latou e tuua’ia i se faafitauli na ‘onanā uma ai ma mama’i le silia ma le to’a 100 fanau a’oga a le iunivesite mai se mea’ai na aai ai (food poisoning).
O lenei faaletonu na tula’i mai le tausaga e 2024 a o faagasolo su’ega faai’u o lena tausaga, ina ua uma ona aai tamaiti a’oga i se mea’ai e ta’ua o le chicken souvlaki, o se meaa’i faa-Eleni, na aai ai tamaiti sa nonofo i apartments o le University Hall ma le Ilam Student Accommodation.
Sa ta’ua i le lipoti ua sau i tua mai se su’esu’ega na faia i lea matāupu, e le’i umi talu ona uma lena taumafataga, ae amata loa ona alia’i aafiaga o tamaiti a’oga.
Ta’ua faapea na matuā umī le solo aga’i i falelēta’ua ona ua manava tatā; o nisi tamaiti ua faasuati mai lava i fafo i faamalama o o latou potu ona ua leai se taimi e toe oo atu ai i se nofoaga talafeagai e suati ai.
Ma o lenei faafitauli ua tuua’ia ai le aosi a tamaiti a’oga, auā o latou na nafa ma le kukaina o lena meaa’i mo i latou uma na nonofo i na nofoaga e lua o le iunivesite.
Na sau le ulua’i faai’uga, e 2 moliaga na molia ai le asosi e sootaga atu i le faama’ia o tamaiti a’oga ina ua ‘onanā mai le mea’ai na fai, ma o na moliaga ta’itasi e oo atu le maualuga o le salatupe i le $200,000.
Na ta’ua e lē o loo tauaveina i le taimi nei tiute o le faatonusili mo le Food Safety, le tama’ita’i o Jenny Bishop, o lea ua ioeina e le asosi a fanau a’oga a le iunivesite le moliaga e tasi i lalo o le tulafono o meataumafa, le Food Act.
Ma o le aso 1 o Tesema i le tausaga nei o le a lauina ai lo latou faasaga i le Faamasinoga Faaitumalo a Kalaiesetete.
Puna o Faamatalaga: https://www.nzherald.co.nz/nz/university-of-canterbury-students-association-admits-charge-for-mass-food-poisoning/IILLNSX53NBYLKIJGXBZEK422E/
