E lua vaiaso ua toe tolopō ai ni tali a alii e to’alua o James Atoa ma Fred Papalii e faasino i moliaga o le aafia o tupe eleelea i ni gaioiga solitulafono ona e le’i mae’a ona tuufaatasia uma moliaga a leoleo ona o loo faasolo pea a latou su’esu’ega.
O le lua foi lea o vaiaso o le a tapena atu ai se tali a loia a leoleo i le la talosaga e tatala i tua i ni aiaiga ma ua toe faaauau ai ona taofia pea i le vaaiga a leoleo i le falepuipui i Tanumalala.
O su’esu’ega o loo faagasolo ua laumanu’ia ai nisi moliaga faaopoopo e aafia ai lava le faaaogāina o tupe eleelea e pei ona māfua ai ona ave le faatonuga a le Faletupe Tutotonu i faletupe o loo faagaioia faapisinisi e taofi le toe faaaogāina o nisi o teugatupe a nisi o tagata o loo aga’i iai su’esu’ega.
O le Aso Gafua na tutula’i ai i le Faamasinoga Maualuga James ma Fred ma o le aso 13 o Iulai e toe valaau ai o la moliaga.
E ese mai moliaga ua tula’i ai i le Faamasinoga Maualuga, ma moliaga o loo tuua’ia ai i le Faamasinoga Faaitumalo lea o loo molia faatasi ai ma le tama’ita’i o Nikitah Charles lea ua faatulaga e su’esu’e molimau i le masina o Setema.
O moliaga ia o le faia o ni gaioiga faaālatua ma le tuuina atu o faamatalaga sesē i leoleo.
