O le tau mafanafana ma le vevela ua faalogoina i Europa e ono tuua’ia i le tele o le ‘aumaliliu ua lipotia mai i lea faaitu o le lalolagi ma o se finagalo faaalia foi lea o le faauluuluga o le Soifua Mālōlōina a le Lalolagi le World Health Organisation poo le WHO.
Fai mai le BBC o atunuu e pei o Siamani, Polani ma le Czech Republic na matua’i faalogoina ai le vevela aemaise lava i le Aso Sa na te’a nei ma ua faailoa ai e Tedros Adhanom Ghebreysus i sana tusitusiga i le upega tafa’ilagi a le X, e silia i le 1,300 i latou ua maliliu talu mai le aso 21 o Iuni e iai sootaga i le tau vevela o loo aafia ai nei Europa.
Fai mai e masani ona faaigoa aafiaga o le tau vevela lea o le silent killer ma o fausaga o fale aemaise falefaigaluega ma falea’oga e lē talafeagai ma lea ituaiga tau.
Ua mae’a faailoa foi e le Matāgaluega o le Soifua Mālōlōina i Farani pe ā ma le afe tagata ua maliliu talu mai le Aso Lulu talu ai ma o le to’atele o i latou e ta’i 65 tausaga le matutua ma sili atu.
O Europa le konetineta e aupito vave ona velasia i le lalolagi e pei ona faailoa e Tedros.
Ua faailoa i lea lipoti a le BBC o le vevela o loo faalogoina i le tele o ia atunuu e ta’i 40 ma ona tupu tikerī.
Puna o Faamatalaga: https://www.bbc.com/news/articles/cn4d2vv935lo
