O se siaki a le ofisa o le tiute na faia i le vaa o le Lady Samoa o loo faia malaga i le va o Mulifanua ma Salelologa na maua ai i le potu o se alii e galue inisinia i le potu o afi o lea vaa la’upasese o le malo, se sikaleti maruana ma fatu e 38 o le laau faasāina.
Ua faailoa lea tulaga i le faai’uga tusitusia a le Faamasinoga Maualuga i le faia o le faasalaga o Mafutaga Eteuati sa galue i lea auaunaga i se tasi o vaa la’upasese o loo tautuaina malaga i le va o Upolu ma Savaii.
Ina ua maua le sikaleti ma fatu maruana na oo le matāupu i leoleo ma faia ai loa moliaga.
Sa muamua tetee lē ua molia i moliaga ae ina ua valaau le matāupu mo le fofogaina o molimau, na suia lea tetee i le ioe o Mafutaga i le moliaga o le umia o le sikaleti maruana ma fatu e 38 o le laau maruana.
O le faasalaga e lima masina ua tuli i le falepuipui mo le umia o fatu o le laau faasāina.
O lona umia o le sikaleti maruana ua faapafala se faasalaga e aunoa ma le faamaonia o lea solitulafono.
O le faai’uga a le faamasinoga ana faapea e na o le sikaleti na maua o ia umia e tau talatuu mai, ae ina ua maua ma fatu o le laau faasāina i le potu o lē ua molia, o se faailoga lea o le faaauau pea ona tagofia e lē ua faasalaina o nakoti poo fuālaau faasāina.
Faaalia i le faai’uga a le faamasinoga, o se tasi lea o aiaiga e sili ona ave iai le faamamafa a le pulega o vaa o loo faia le tautua i malaga i le va o motu o le atunuu, o le faia o siaki faafuase’i a le ofisa o le tiute i lana ‘aufaigaluega i luga o vaa ina ia mautinoa e leai se isi e na te faaaogā fuālaau faasāina.
