O faipelega faavaomalo sa faia i le po o le Aso Faraile ua mavae i le faletaalo o le Iunivesite Aoao o Samoa o se tasi o tausinioga tau taaloga o le faailogaina o le 64 tausaga o le Tuto’atasi, ua manumalo uma ai alii fusu o Samoa ia Jolando Ta’ala ma Saliuafi Tuāutu ia la fusuga ma alii Fiti ua faamauina ai, o la fusuaga muamua ia faapolofesa ua mafai ai e ni alo o le atunuu i lea taaloga ona faato’ilalo ni alii fusu ua tele tausaga o tausiniō i le taaloga faipele i le vaega o fusuaga faapolofesa i le Pasefika i Saute.
Ua faailoa i se pepa o faamatalaga mai le Independent Boxing Samoa sa mata’ina foi i lea po le manumalo o nisi o alo o le atunuu i paga o fusuaga faa-amateur lea sa tausinio ai foi alii ma tama’ita’i.
O ia fusuaga sa tapena i se faiga faapaaga ma le alo lauiloa o Samoa i le taaloga faipele le afioga Faumuina Toaletai David Tua, ma o ia foi o se tasi o faia’oga sa tu malosi i le tapenaina o le ‘aufusu a le atunuu sa tausiniō ma alii fusu mai Fiti i le paga o le Cruiserweight ma le Lightheavy weight.
O le tausaga fou i le faailogaina o le 65 tausaga o le Tuto’atasi o le a toe tapena ai foi se isi fusuaga faavaomalo a le Independent Boxing Samoa.
