Ua faamaonia mai nei le aapa atu o le New Zealand Rugby e tuu atu le tau’au e fesoasoani i le ‘au a le Moana Pasifika e ala i ana tama taaalo.
Ua faamauina o lea fesoasoani o le a totogi ai e le Lakapi Niu Sila tama taaalo se’ia pā’ia le faai’uga o le masina o Iulai, a o taumafai pea le Kalapu a le Moana Pasefika e sa’ili fofō i tulaga pagatia ua iai nei.
Ta’ua o lenei laasaga ua aga’i iai le faalapotopotoga a le Lakapi Niu Sila i le mae’a ai o fuafuaga o le faama’ape ai o le kalapu lakapi i lenei vaiaso, a o lumana’i ai lana taaloga mulimuli i lalo o le pulega o loo iai, e pei ona tapena atu ai e taaalo ma le ‘au a le Brumbies i Canberra.
Faaalia e le faia’oga ulu a le ‘au, Faalogo Tana Umaga, o se tala fiafia ma o se tala ua talia ma le agaga faafetai e tama taaalo faapea lana pulega le fesoasoani a le faalapotopotoga lakapi a Niu Sila, e ui e lē o mautonu le tulaga o loo iai le Moana Pasifika.
Faamanino e Umaga e ui ua na o sina taimi puupuu ae o se tala ua matua’i talisapaia e tama taaalo, i le mafai ona maua ai o se fesoasoani mo i latou ma o latou aiga ma fuafuaga.
I le taimi nei o loo māua le faia pea o faatalanoaga i ni taumafaiga e faatumauina ai lea kalapu.
O le tasi o talosaga o loo aofia ai le vaega ua ta’ua o le Kanaloa Consortium, e pei ona māua o ē o loo iai sootaga ma sui tuai a le All Blacks, o Jerome Kaino ma Joe Rokocoko
Faamanino mai e le Kanaloa Consortium ma le asosi o tagata taaalo lakapi o le Pasefika poo le Pacific Rugby Players’ Association, o loo faasolo pea faatalanoaga ma o le a maua se tali i se taimi e lē o toe mamao.
