O le faatinoina o galuega a le Faamasinoga Maualuga sa avea ma Faamasinoga o Faigāpalota i le amataga o ana galuega i le su’esu’eina o le tagi tau palota mai le itumalo o Falealili 1 mai lona amataga se’ia oo ina mae’a ma faia lana faai’uga, sa faatino e tusa o mana’oga o le tulafono faavae ma le tulafono o faigāpalota a Samoa.
O le aotelega lea o se finagalo o le Faamasinoga o Talosaga Apili a le Faamasinoga Maualuga a le atunuu ina ua mae’a lana iloiloga i le talosaga a lē sa avea ma faipule o Falealili 1, le afioga Toelupe Maoiautele Poumulinuku Onesemo ma taunuu ai le Faamasinoga o Talosaga Apili i le teena ma soloia uma vaega autū sa faavae ai le talosaga.
O le finauga i le aafia o aiā tatau faalefaavae i le lē tula’i o lē na talosaga ma ana molimau faasaga i le moliaga sa tuua’ia ai, ua faaalia e le faamasinoga apili i lana faai’uga, sa tuu avanoa le faamasinoga ae sa lē talia e le loia a lē ua talosaga.
Na faatino foi le tiute o le faamasinoga i tusi samania ma poloa’iga e tatau ai ona oo atu molimau a lē sa tuua’ia i le tagi tau palota, ae leai nisi na oo atu i le faamasinoga.
O molimau tautō ua mae’a ona saini lea sa faaaogā i su’esu’ega a le Faamasinoga o Faigāpalota, ua faamalieina le Faamasinoga o Talosaga Apili sa faaaogā e tusa o mana’oga o le tulafono, e ui sa finauina e le talosaga apili o ni mau faalogo, le hearsay evidence.
Ua teena ai e le Faamasinoga o Talosaga ma le tasi o mau a lē na talosaga sa pitotasi le faatinoga o le galuega a le faamasinoga na su’esu’eina le tagi tau palota, e ui e le’i oo se faamatalaga a le loia na finauina le talosaga a lē sa avea ma faipule e au’ili’ili ai lea vaega o mau a le itu na talosaga.
Ua faailoa ai i le faai’uga a le Faamasinoga o Talosaga le malosi ma le maopoopo o aiaiga o le tulafono o faigāpalota a Samoa o loo iai le malosi’aga e faatino ai e le Faamasinoga o Faigāpalota ana galuega i le mea silisili, e mafai ai ona va’ili’ili ma su’esu’e ni tuua’iga o faiga faaālatua e māfua mai i se faigāpalota e filifilia ai sui o le Palemene, ina ia taunuu i le faia o le amiotonu ma faamalieina ai mana’oga o pulega faatemokarasi.
Ua faatumau ai le faai’uga ua soloia ai le tofi faipule o lē sa seei i le nofoa o Falealili 1 i le Paea’iga 18 a le Palemene.
