Ua toe faatāua e le malo le auaunaga ma le galuega a le komiti o le faamatagofieina o Samoa e pei ona toe foi atu i le vaaiga a le pulega o tagata tafafao lea komiti.
Ua faailoa ai e le Pulega o Tagata Tafafao le avea o le afioga Peseta Robert Ah Sam e faauluulu iai galuega a lea komiti ua feagai nei ma le una’ia o le polokalame o le faamatagofieina o nuu ma afio’aga o le atunuu.
O se komiti sa tele lona sao tāua i tausaga e tele ua mavae a o taumafai mai le una’ia o le atina’e o tagata tafafao, lea sa faia ai tauvaga ma mau faailoga ai nisi o nuu i le faai’uga o tauvaga o le faamamāina ma le faamatagofie o aai ma faoāaai auā o le tasi lea o faatosina lelei i le malaga tafafao mai o malo ma tulisi mai fafo.
O le faai’uga o le masina o Setema e taualuga iai le galuega o loo faagasolo o le faamatagofie o nuu ma afio’aga o Samoa, ma o le faamanatuina o le tuto’atasi i le masina ua alu atu nei o Iuni, na faalauiloa ai e le ta’ita’i o le malo le toe faatula’i mai o le komiti o le faamatagofieina o Samoa.
