O le malaga atu i Fiti o le aufusu a Samoa sa koleni ma faamaopoopo e le faalapotopotoga tuma’oti o faipelega a Samoa le Independent Boxing Samoa poo le IBS, o lea ua mae’a le taamilosaga o le Ipu a le Pasefika sa tausiniō ai ma ua foi mai i le atunuu ma le aofa’iga e 19 pine e aofia ai pine auro e 12 ma pine siliva e 7.
O se isi lea o laasaga maualuga ua ausia e tama fusu o lea faalapotopotoga o le taaloga faipelē i Samoa ina ua mae’a le taamilosaga i Thailand sa tausiniō ai foi i le masina o Mati ma foi mai ai ma le pine auro e tasi ma le pine siliva foi e tasi.
O tapenaga a le aufusu a le IBS sa taulamua ai le pelesetene le afioga Tavu’i Mike Lemisio ae lagolago malosi iai ma se tasi o alo lauiloa o le atunuu i le taaloga o le fusu le susuga To’aletai David Tua.
