E silia i le to’a limaselau tagata taaalo i le vaega o alii ma tama’ita’i i le taaloga siisii u’amea mamafa mai atunuu e 70 o le lalolagi ua amata ona taunuu i Samoa, a o le’i tatalaina i le Aso Toonai o lenei vaiaso le taamilosaga mo le Ipu o le Atulaulau poo le Universal Cup.
O se tausiniōga ua talimalo ai Samoa mo le taimi muamua e pei ona ave iai le lagolago malosi a le malo.
Ua faailoa i le fono ma tusitala e sui o le taaloga siisii u’amea mamafa, e iai nisi o ‘au masii o loo feagai ma faafitauli i le tuai maua o visa e afea ai atunuu e pei o Niu Sila ma Ausetalia a o le’i faaauau mai i Samoa, e māfua i tulafono tau femalagaa’iga a ia atunuu.
Ae ua faailoa e le Pelesetene o le taaloga siisii u’amea mamafa a Samoa, ua tapena le ausiisii a le atunuu i lea taamilosaga faavaomalo o le a tausiniō ai nisi o tagata taaalo i le siisii u’amea mamafa sa tausiniō i taaloga o le Olimipeka ma taaloga a Malo o le Taupulega.
Le afioga Tuaopepe Jerry Wallwork o le Pelesetene o le taaloga siisii u’amea mamafa a Samoa ma o le faia’oga foi o le ausiisii a le atunuu.
