O se taumafaiga e fasioti se tasi ua māfua ai se su’esu’ega i Monaco ma Farani lea fai mai leoleo e to’atolu tagata na manunu’a ai i le Aso Gafua ina ua pā se pomu i se tasi o fale i se tasi o aai maumea i lea itu o le lalolagi.
Ua faailoa o le gaioiga na taumafai ai e fasioti se alii Ukraine.
Fai mai lipoti a le CNN o le tagata faipisinisi o Vadym Yermolaiev ua aga’i ese ma le atunuu ma sa ia faafitia lona sitiseni Ukraine i le 2019.
I se pepa o faamatalaga mai le ofisa o le va i fafo a Ukraine ua ta’ua ai o le to’atolu o loo manunu’a i lenei faalavelave o ni sui o se aiga e tupuga mai Ukraine.
Saunoa le loia o loo feagai ma le matāupu lea Stephanie Thibault na alu ane se tagata e lē o iloa poo ai, tuu le pomu i le fale lea na aafia a o le’i tāina le 9 i le po o le Aso Gafua ma o le to’atolu ua lipotia na aafia na faavave atu i le falema’i i Farani.
E lē o iloa i le taimi nei poo le ā tonu le māfua’aga o lea taumafaiga e faaoo le oti i sea tagata Ukraine.
Puna o Faamatalaga: https://edition.cnn.com/2026/06/30/world/monaco-manhunt-explosion-intl-hnk
