O lea ua amata faagasolo taaloga o le liki kilikiti faasamoa mo le faamoemoe e sa’ili le siamupini i le taimi o aso fiafia o le Sisigafu’a ia Iuni, ma o se taimi muamua lenei ua oo ai i le 50 ‘aukilikiti i le vaega o alii ma tama’ita’i ua auai.
O le amataga o le vaiaso na tatala ai le liki i le savali faaaloalo a aukilikiti uma sa faatumulia ai lumāmaota o le malo lea na saunoa ai le ta’ita’i o le malo ma faafetaia le komiti o loo tapenaina le faamoemoe.
O loo faagasolo uma i Upolu taaloga o le liki kilikiti faasamoa ma o loo faaaogā ai i nisi o taaloga malae o le kilikiti faapeletania i Tuanaimato i ni aiaiga ua faataoto e ta’iala ai le faaaogāina o ia malae.
