O le tāua o fesootaiga tau initaneti mo le aoaoina o fanau faapea ma galuega faatino a faiaoga e maua ai faamatalaga tāua, ua faailoa ai e le Minisita o A’oga ma Aganuu i lana folasaga i le palemene, e valusefulu a’oga o le a maua ia fesootaiga televavave mai le Auaunaga a le Kamupani o le Starlink.
Faaalia e le Minisita le afioga Aiono Alec Ekeroma i lana saunoaga e tali ai i mataupu tau fesootaiga mo a’oga sa fesili ai le faipule o Faleata 3, e valuselau afe tālā se vaegatupe o le a faatino ai le galuega o le faaooina atu o ia fesootaiga i a’oga e 80 e faaaoga iai le auaunaga a kamupani telefoni ma fesootaiga o le Digicel ma le Vodafone, ae o loo iai isi vaegatupe o le a faaauau ai lea galuega mo isi a’oga i le atunuu mai le faasoa a le vaega o fesootaiga faaonapo nei a le Matagaluega o A’oga ma Aganuu.
O le faailoa e le Minisita o A’oga o le faatino ai e le Vodafone ma le Digicel o le galuega o le faapipiina o fesootaiga satellite a le Starlink mo le maua e a’oga o le initaneti, na mafua mai i le fesiligia o le vaegatupe e lata i le miliona tālā ua totogi ai e le Matagaluega o A’oga ma Aganuu pili tu’ua a le Kamupani o le Bluewave wireless sa faia le galuega o le faaooina atu o ia fesootaiga i a’oga.
