O feiloa’iga ta’i vaiaso a le vasega o tusitala ma le ta’ita’i o le malo lea ua silia nei i le masina e le’i toe faia, o lea ua faailoa e le Palemia i le fono a le Palemene ina ua taualuga iai tali a le Kapeneta i le po anapo, e lē toe faia ia feiloa’iga.
O le saunoaga foi a le Palemia i taualumaga a le fono aoao faitulafono na ia faailoa ai le faia o su’esu’ega i se matāgaluega a le malo ua masalomia na liki ai i tua se pepa o le faai’uga a le Kapeneta lea sa faailoa ai le totogiina o pili tuua a le kamupani o le Bluewave wireless.
Le afioga i le Palemia susuga Laaulialemalietoa Leuatea Polataivao Fosi i se vaega o lana saunoaga na taualuga iai tali a le malo i matāupu sa laga e sui faipule ia latou saunoaga faalaua’itele i le tala faatatau autū o le tupe.
O le mae’a o le tali a le malo na faagasolo ai ma galuega a le Palemene i laasaga mulimuli o le soalaupuleina o le tala o le tupe mo le tausaga faaletupe fou lea ua pasia.
Ua tolopo tauaofiaga a le fono aoao faitulafono.
