O le aso 5 ma le aso 6 o Novema o le tausaga nei ua faatulaga e tagofia ai e le Faamasinoga o Talosaga Apili a le Faamasinoga o Fanua ma Suafa, le faai’uga a le Faamasinoga Maualuga a lea faamasinoga na faatonuina ai le faatula’i ese o aiga e 18 mai se vaega o eleele o loo i tua mai o le 723 eka o fanua o Afega ua mae’a ona faamatuu atu faaletulafono, e nofoia e aiga ma tagata o le nuu o Leauvaa.
O le Aso Faraile ua mavae na aumai ai lea faai’uga a le afioga i le tama’ita’i faamasino le afioga Alalatoa Rosella Papalii sa tauaveina su’esu’ega o le talosaga apili.
Ua avanoa i lea faai’uga ona toe su’esu’e ai ma nisi o faai’uga e faasino lava i eleele o loo finau ai Leauvaa ma Afega sa fofogaina i le aso 18 o Setema o le tausaga e 2017, faai’uga o le aso 18 o Tesema o le tausaga e 2018, ma faai’uga o le aso 23 o Mati o le tausaga e 2023 ma le aso 4 o Mati o le tausaga e 2024.
Ua faatonuina ai e le faamasinoga le itu talosaga ina ia fuaina uma tuaoi o fanua o loo faamauina o le poloka 29 ma le 30 ma tuuina atu mo su’esu’ega a le Faamasinoga o Talosaga Apili, aemaise ia tuuina atu ma se famatalaga pe na faapefea ona nofoia ia eleele o loo i tua mai o le 723 eka.
Ua faaalia i le faai’uga le tāua o le toe iloilo o nisi o faai’uga e fesoota’i i eleele o loo tula’i mai ai le finauga ina ia faia le amiotonu ma taoto ai i lagatonu ni eseesega o finagalo o itu o loo aafia i lea matāupu tau Faamasinoga o Fanua ma Suafa.
