Ua faatali leoleo i Samoa i tali o a latou fesili ua ave i leoleo i le atunuu o Vietnam mo ni tali a alii talavou mai Samoa o Joseph Vaa ma Steve Tofa e fesoasoani i su’esu’ega o loo faagasolo lea e autū i le sa’ilia o ni sootaga i Samoa i le faatinoina o le solitulafono ua molia ai e leoleo o lea atunuu ia alii talavou mai Samoa.
Ua faailoa lea tulaga e le Sui Komesina o leoleo le susuga Leiataua Samuelu Afamasaga a o faia ai feutana’iga i le va o malo lea o loo galulue ai le Matāgaluega o le Va i Fafo ma Fefaatauaiga a le malo o Samoa.
O le talosaga na ave mo se avanoa e malaga ai ni leoleo sinia e faatalanoa ia alii talavou i Vietnam ua faaalia e le Sui Komesina e lē talia, ae ua na o fesili ua aumai le faatanaga e tuuina atu.
Ae i su’esu’ega o loo faagasolo pea, ua faailoa e le Sui Komesina ua iai moliaga faaopoopo ua faia faasaga i nisi o le to’atolu ua molia i le tuuina atu o faamatalaga sesē i leoleo ma le faia o se gaioiga faaālatua.
O ia moliaga faaopoopo o le faaaogā o tupe eleelea i ni gaioiga solitulafono poo money laundering.
Ua faaalia ai e Leiataua Samuelu Afamasaga ua laki le vave o gaioiga a leoleo ina ua tupu mai le faalavelave ma tuua’ia ai alii talavou o Samoa lea ua mafai ai ona maua ia tupe, e pei ona taofia ai ona toe faaaogā e ni tagata se to’aiva a latou teugatupe.
O le Aso Lua o lenei vaiaso o le a toe tutula’i ai i le faamasinoga i latou e to’atolu ua molia mai su’esu’ega a leoleo i le sa’ilia o sootaga aga’i i le faalavelave i Vietnam i le silia ai nei ma le masina talu ona faaoo le maliu ia Lorenzo Lemalu o se tagatānuu o Ausetalia, o le ta’ita’i o le kegi o le Coconut Cartel i Sini Ausetalia.
O i latou ua molia i Samoa o Fred Papalii, o James Atua ma lona to’alua o Nahkita Charles ma o i la’ua ia sa taofia mai le malae vaalele i Faleolo.
O le valaauga i le Faamasinoga Faaitumalo e tatau ona faamautū uma ai moliaga a leoleo ma iloa ai ni tali a i latou i moliaga.
