O le afea o Samoa e tagata e malaga mai e asiasi i aiga, ma tafafao o loo numela tasi ai pea Niu Sila pito iai Ausetalia.
Ua molimauina lea tulaga i faamaumauga lata mai ua faailoa e le pulega o tagata tafafao mai i Samoa mo le masina o Me o le tausaga nei, a o tālia ai faamaumauga mo le masina o Iuni.
I le masina o Me, e 21 afe 419 tagata na malaga mai i le atunuu ma se siitaga e 12 tesimale 2 pasene pe a faatusa i isi masina ua mae’a o lenei tausaga.
O faamaumauga lata mai foi ua faailoa ai o le 93 tesimale 7 pasene o tagata malaga e faaaogā vaalele pe a faatusa i le na o le 6 tesimale 3 pasene o i latou e malaga mai i vaa o le sami.
I tagata na malaga mai ia Me lea e silia i le 21 afe ma le fāselau o le 15 afe 772 o tagata sa tafafao mai i Samoa, o se siitaga e 11 tesimale 1 pasene pe a faatusatusa i tagata tafafao na afea le atunuu i le masina o Aperila o le tausaga nei lava, ma o se siitaga maoa’e e tusa ma le 12 tesimale 8 pasene pe a faatusatusa i le masina o Me o le tausaga ua mavae 2025.
Mai le aofa’iga e 15 afe 772 o tagata tafafao ia Me o le tausaga nei, o le 8 afe ma le 41 o le ‘autafafao e mai Niu Sila, o se siitaga e 51 pasene, ae o Ausetalia e 3 afe 358.
O tagata tafafao mai isi atunuu e pei o Amerika e 1,770 ma Amerika Samoa e 236.
Faaalia e le pulega o tagata tafafao o le siitia pea o tagata tafafao ma asiasi mai e afea le atunuu o se faailoga lea o le faaauau pea o le sologa lelei o taumafaiga e una’ia taumafaiga e faatosina mai ai tagata tafafao e afea Samoa, i le silia i le 15 afe na asiasi mai i le atunuu ia Me o lenei tausaga o le 6 afe 662 o tulisi tafafao a o le 5,465 o tagata tafafao sa asiasi mai i aiga ma uō.
O le 2,290 o tagata na malaga mai i Samoa ia Me ona o malaga i fonotaga faapisinisi ma le 133 sa malaga mai i lea lava masina o le tausaga nei ona o taaloga.
